Ibarraundi Museoa. (Eskoriatza)

Eskoriatzako Museo Eskolaren sorrera, Aitzorrotz Etnografi Taldeak bultzatu zuen Eskoriatzako
Udaletxearekin batera. 1983.an sortu zenetik, elkarte honen helburua Eskoriatzako kultura eta etnografia ondarearen babesa izan zen, baserri asko berritzen hasi zirenean, hainbat tresna erre edo galtzen zihoazela konturatu baikinen.

Lehenengo etnografia erakusketarekin hasi genuen gure ibilbidea, eta gure helburua lortu ere, handik aurrera gutxi batzuek besterik ez baitzituzten antzinako tresnak bota. Gehienek, tresna hauek konpondu eta gorde egin dituzte altxorra bailiran. Beste batzuk, tresnak ekarri ere egin zituzten, museoko ondarea aberasteko edota erakusketan jartzeko. Hauekin guztiekin eta Udaletxeak erositako errementari eta sarrailagintza bilduma eta egurrezko bi taila ederrekin, jarri genuen martxan gure Museoa.

Museo klasikoaren kontzeptua aldatu genuen, "Ez ukitu" edota "isilik mesedez" bezalakoen ordez, guk zentzumen guztiak erabiltzea proposatzen genuen, ez bakarrik ikusmena, baizik eta ukimena, usaimena... baita dastamena ere, tailer eta ikus entzunezkoen bitartez, gure jatorri eta historia hobeto ulertzeko. Egun, Museoak eskaintzen duen aukera hau, gazte zein helduentzat oso erakargarria dela konturatu gara.
Gaiak borobildu, elkartu eta bere onera ekartzeko, ingurugiro gaia da museora sartu bezain laster aurkezten dugun lehen gaia, eta beste gai guztietan txertatzen duguna.

Azken urteetan, museoa lau hormetatik atera eta Eskoriatza osoa museo bat izateko pausuak ematen ari gara. Herriko agintari eta beste erakundeen laguntzarekin, daukagun ondarerik esanguratsuena berreskuratzen ari gara: jauregiak, elizak, ermitak, baserriak, monumentu megalitikoak, basoak... bisitatu ahal izateko.

Udaletxeak, XVI. mendeko Ibarraundi jauregia erosi du eta zaharberritzeari ekin zaio museoa bertan kokatzeko. Horrez gain, Museoaren inguruan Etnografia Parke bat egingo dugu, Debagoieneko industrializazioaren oinarria izan ziren hainbat lanbide eta artisautza kokatuko ditugularik.

Ordutegia:

Igandeetan: 11:00 - 14:00 / 17:00 - 20:00
Astean zehar aurrez eskatuta.

Ibarraundi Jauregia

Tel.: 943 71 54 53

Helbide elektroniko honek spam bot-en kontrako babesa du. Ikusteko Javascript-a aktibatu behar duzu